தனுஷ் படத்திலிருந்து வெளியேறினார் அமலாபால்: ஐஸ்வர்யா என்ட்ரி
4/19/2017 3:38:48 PM
இயக்குனர் விஜய்யிடமிருந்து விவாகரத்து பெற்று பிரிந்து வாழும் அமலாபால், முழுகவனத்தையும் நடிப்பில் திருப்பியிருக்கிறார். நடிகர் தனுஷ் தான் தயாரித்த அம்மா கணக்கு படத்தில் அமலா பாலுக்கு பிரதான வேடம் அளித்தார். இதையடுத்து தான் நடிக்கும் வடசென்னை படத்தில் ஹீரோயினாக ஒப்பந்தம் செய்தார். இப்படத்தை வெற்றிமாறன் இயக்குகிறார். இதன் படப்பிடிப்பு தொடங்கியபோதிலும் தொடர்ச்சியாக நடக்காமல் இடைவெளி விட்டு நடத்தப்படுகிறது. தனுஷ் ஏற்கனவே ஒப்புக்கொண்ட படங்களில் நடிப்பதற்கு ஏதுவாகவும், சொந்தமாக அவர் இயக்கிய பவர் பாண்டி படப்பிடிப்பை முடிப்பதற்கு தோதாகவும் வட சென்னை படப்பிடிப்பு பணிகள் திட்டமிடப்பட்டன. இதனால் இதன் படப்பிடிப்பு தொடர்ச்சியாக நடத்துவதில் சிக்கல் ஏற்பட்டது. இதற்கிடையில் அமலாபால் வேறு படங்களில் நடிக்க ஒப்புக்கொண்டார். பவர் பாண்டி முடிந்து சமீபத்தில் ரிலீஸ் ஆன நிலையில் மீண்டும் வட சென்னை படப்பிடிப்பில் பங்கேற்றுள்ளார் தனுஷ்.
ஆனால் முன்னதாக வேறு படங்களுக்கு கால்ஷீட் தந்த அமலாபால், வட சென்னை படப்பிடிப்பில் பங்கேற்க முடியாத சூழல் ஏற்பட்டது. இதனால் படப்பிடிப்பு தடைபடும் நிலை உருவானது. அதை தவிர்க்கும் விதமாக அமலாபாலுக்கு பதிலாக வேறு நடிகையை ஒப்பந்தம் செய்ய இயக்குனர் வெற்றி மாறன் முடிவு செய்தார். அதன்படி அமலாபால் நீக்கப்பட்டு அவருக்கு பதிலாக காக்கா முட்டை, தர்மதுரை படங்களில் நடித்த ஐஸ்வர்யா ராஜேஷ் ஒப்பந்தம் செய்யப்பட்டார். உடனடியாக அவர் படப்பிடிப்பிலும் பங்கேற்றார். வட சென்னை படத்தில் முதலில் சமந்தா ஹீரோயினாக நடிப்பதாக இருந்தது. அவருக்கு திருமணம் பேசப்பட்டதையடுத்து விலகினார். பிறகு அமலாபால் ஒப்பந்தம் ஆனார். தற்போது அவரும் விலகி இருக்கிறார் என்பது குறிப்பிடத்தக்கது.
