போதை பாதுகாவலர்களுடன் நள்ளிரவு கார் பயணம்: பாவனா பாணியில் கடத்தப்படுவோமா? இளம் நடிகை அலியாபட் திகில்
4/19/2017 3:39:15 PM
கடந்த மாதம் படப்பிடிப்பு முடித்து காரில் வீடு திரும்பிக்கொண்டிருந்த நடிகை பாவனாவை 2 டிரைவர்கள் உள்ளிட்ட சிலர் கடத்தி சென்று பாலியல் தொல்லை தந்த சம்பவம் தென்னிந்திய திரையுலகம் மட்டுமல்லாமல் பாலிவுட்டில் கடும் அதிர்ச்சியை ஏற்படுத்தியது. இதுதொடர்பான விசாரணை நடந்து வருகிறது. இந்த சம்பவத்துக்கு பிறகு ஹீரோயின்கள் திகிலுடனே தங்கள் பணிகளை செய்து வருகின்றனர். பாலிவுட் இளம் முன்னணி நடிகை அலியாபட். நேற்றுமுன் தினம் தனது பாய்பிரண்டும் நடிகருமான சித்தார்த் மல்ஹோத்ராவை பார்ப்பதற்காக இரவில் சென்றார். அலியாவுக்கு பாதுகாப்பாக பாதுகாவலர்கள் சிலரும் சென்றனர். இரவு வெகுநேரம் பாய்பிரண்டுடன் பொழுதை கழித்த அலியாபட் அதிகாலை 3 மணிக்கு வீட்டுக்கு புறப்பட்டார். வெளியில் வந்து பார்த்தபோது தனது கார் மட்டும் இருந்தது. உடன்வந்த பாதுகாவலர்களை காணவில்லை. அருகில் எங்காவது இருப்பார்கள் என்று 2 முறை அழைத்துப்பார்த்தார். வந்தபாடில்லை. பிறகு சத்தமாக பலமுறை பாதுகாவலர்களை அழைத்தபடி இருந்தார்.
சில நிமிடங்களுக்குபிறகு குடிபோதையில் தள்ளாடிய நிலையில் அவர்கள் வந்து நின்றனர். அவர்களை கண்டு உறைந்துபோனார் அலியாபட்.
மெல்லிய விளக்கொளியும் சுற்றுப்புறங்களில் கும்மிருட்டாகவும் இருந்ததால் அவர்களுடன் எந்த பிரச்னையும் செய்யாமல் காரில் ஏறி அமர்ந்தார் அலியாபட். பின் இருக்கையில் பாதுகாவலர்கள் அமர்ந்துகொண்டனர். என்ன நடக்குமோ என்ற பயத்துடனே அவர் வீடு வந்து சேர்ந்தார். அதன்பிறகு சம்பந்தப்பட்ட பாதுகாப்பு ஏஜென்சியினரிடம் புகார் செய்ததுடன் குடிகார பாதுகாவலர்கள் மீது நடவடிக்கை எடுக்கும்படியும், வேறு பாதுகாவலர்களை பணியில் அமர்த்தவும் கேட்டுக்கொண்டார்.
