பாஸ்போர்ட் போட்டோவில் வித்தியாசம்; நடிகையை தடுத்து நிறுத்திய அதிகாரிகள்: விமான நிலையத்தில் பரபரப்பு
2/28/2023 5:36:27 PM
கோலாலம்பூர்: பாஸ்போர்ட்டில் உள்ள புகைப்படத்தில் வித்தியாசம் இருந்ததால் உக்ரைன் நாட்டு நடிகையை விமான நிலைய அதிகாரிகள் தடுத்து நிறுத்தினர். உக்ரைன் நாட்டு நடிகையும், தைவானைச் சேர்ந்த மாடல் அழகியுமான டாட்டியானா லின் (24) என்பவர் தனது காதலனுடன் மலேசியாவில் இருந்தார். அவர் அந்நாட்டு விமான நிலையத்திற்கு வந்தார். அவரது பாஸ்போர்ட்டை சுங்கத்துறை மற்றும் பாதுகாப்பு துறையினர் சரிபார்த்தனர். பாஸ்போர்ட்டில் இருக்கும் புகைப்படத்திற்கும், நேரில் இருக்கும் டாட்டியானா லினின் உருவத்திற்கும் வித்தியாசம் இருந்தது.
அதனால் அவர் தடுத்து வைக்கப்பட்டு விசாரணைக்கு உட்படுத்தப்பட்டனர். பல மணி நேர விசாரணைக்கு பின்னர் அவர் அனுமதிக்கப்பட்டார். இதுகுறித்து அவர் சீன மொழியில் வெளியிட்ட சமூக வலைதள பதிவில், ‘எனது பாஸ்போர்ட்டில் இருந்த புகைப்படம் (மேக்கப் இல்லாதது), என்னுடைய தற்போதைய முகத்துடன் ஒத்துப் போகாததால் விமான நிலையத்தில் நுழைய அதிகாரிகள் அனுமதிக்கவில்லை’ என்று தெரிவித்துள்ளார்.
