திருப்பதி கோயிலில் சுவாமி தரிசனம் செய்ய ஏப்ரல், ஜூன் மாத தரிசன டிக்கெட் இன்று மாலை ஆன்லைனில் வெளியீடு
3/21/2023 5:59:41 PM
திருமலை: திருப்பதி ஏழுமலையான் கோயிலில் சுவாமி தரிசனம் செய்வதற்கான ஏப்ரல் மற்றும் ஜூன் மாதத்திற்கான பல்வேறு தரிசன டிக்கெட் இன்று மாலை ஆன்லைனில் வெளியிடப்பட உள்ளது. திருப்பதி ஏழுமலையான் கோயிலில் ஜூன் மாதத்திற்கான வாணி அறக்கட்டளைக்கு ரூ.10 ஆயிரம் நன்கொடை வழங்கும் பக்தர்களுக்கு விஐபி டிக்கெட் ஒதுக்கீடு ஆன்லைனில் இன்று மாலை 3 மணிக்கும், கல்யாண உற்சவம், ஊஞ்சல் சேவை, ஆர்ஜித பிரம்மோற்சவம் மற்றும் சகஸ்ர தீப அலங்கார சேவை டிக்கெட்கள் வரும் 23ம்தேதி காலை 10 மணிக்கும் ஆன்லைனில் வெளியிடப்பட உள்ளது. சுப்ரபாதம், அர்ச்சனை, தோமாலை உள்ளிட்ட ஜூன் மாதத்திற்கான ஆர்ஜித சேவை டிக்கெட் வரும் 24ம்தேதி காலை 11 மணிக்கு தொடங்கும். குலுக்கலில் தேர்ந்தெடுக்கப்பட்ட பக்தர்கள் மொபைல் போனுக்கு வரும் மெசேஜ் வைத்து பணம் செலுத்தி உறுதிப்படுத்தி கொள்ள வேண்டும்.
மேலும் ஜூன் மாதத்திற்கான அங்கப்பிரதட்சண இலவச டிக்கெட் வரும் 24ம்தேதி காலை 10 மணிக்கு ஆன்லைனில் வெளியிடப்பட உள்ளது. முதியவர்கள், மாற்றுத்திறனாளிகள் மற்றும் தீராத நோய்வாய்ப்பட்டவர்கள் ஏழுமலையானை தரிசிக்க ஏப்ரல் மாதத்திற்கான இலவச சிறப்பு தரிசன டிக்கெட் வரும் 24ம்தேதி மாலை 3 மணிக்கு வெளியிடப்பட உள்ளது. எனவே பக்தர்கள் இதை கவனத்தில் கொண்டு தங்களுக்கு தேவையான டிக்கெட் முன்பதிவு செய்யுமாறு தேவஸ்தானம் வெளியிட்டுள்ள அறிக்கையில் தெரிவிக்கப்பட்டுள்ளது.
