மின்வேலியில் சிக்கி கல்லூரி மாணவன் பலி: விவசாயி கைது
3/13/2023 6:04:34 PM
ராணிப்பேட்டை: ராணிப்பேட்டை மாவட்டம் நெமிலி அடுத்த நெல்வாய் கிராமத்தை சேர்ந்தவர் விக்னேஷ்(19). ஓச்சேரி அருகே உள்ள தனியார் கல்லூரி மாணவன். இவர் தனது நண்பர்கள் சூர்யா, விஜயகணபதி, மணிகண்டன், வெங்கடேசன் ஆகியோருடன் பக்கத்து கிராமமான அசநெல்லிகுப்பத்தில் நேற்றிரவு நடந்த மாரியம்மன் கோயில் திருவிழாவை பார்க்க சென்றார். விழா முடிந்து இரவு 11 மணியளவில் அனைவரும் வீட்டிற்கு புறப்பட்டனர். திருமால்பூர் செல்லும் சாலை வழியாக தங்கள் கிராமத்திற்கு நடந்து சென்றனர்.
அப்போது இயற்கை உபாதை கழிக்க அங்குள்ள கோழிப்பண்ணையொட்டி வரதன் என்பவரது நெல்வயல் பக்கமாக சென்றனர். அங்கு காட்டுப்பன்றிகளிடம் இருந்து பயிரை காப்பாற்ற அனுமதியின்றி வைத்திருந்த மின்வேலியை எதிர்பாராதவகையில் விக்னேஷ் மிதித்துள்ளார். இதில் மின்சாரம் பாய்ந்து அவர் தூக்கி வீசப்பட்டதில் மயங்கி விழுந்தார். இதை பார்த்து அதிர்ச்சியடைந்த அவருடன் வந்த நண்பர்கள் 108 ஆம்புலன்ஸ் மூலம் விக்னேஷை அரக்கோணம் அரசு மருத்துவமனைக்கு கொண்டு சென்றனர்.
அங்கு பரிசோதித்த டாக்டர்கள், விக்னேஷ் இறந்து விட்டதாக தெரிவித்தனர். இதுகுறித்து தகவலறிந்த போலீசார் சம்பவ இடத்திற்கு சென்று விசாரணை நடத்தினர். விக்னேஷின் தந்தை ரவி நெமிலி போலீசில் புகார் செய்தார். அதன்பேரில் போலீசார் வழக்குப்பதிவு செய்து, அனுமதியின்றி மின்வேலி அமைத்த விவசாயி வரதன்(70) என்பவரை கைது செய்து விசாரித்து வருகின்றனர்.
