கத்தியுடன் பைக்கில் சுற்றிய இளைஞர்கள் 2 பேர் கைது
3/21/2023 5:52:02 PM
பெரம்பூர்: சென்னை புளியந்தோப்பு டிக்காஸ்டர் ரோடு பகுதியில் இரவு முழுவதும் ஏராளமான பிரியாணி கடைகள் செயல்பட்டு வருகிறது. சென்னையில் பல பகுதிகளில் இருந்தும் இரவு நேரங்களில் பிரியாணி சாப்பிடவும் மொத்தமாக வாங்கி செல்லவும் ஏராளமானோர் வருகின்றனர். இன்று அதிகாலை 6 மணி அளவில் ஒரு பிரியாணி கடையில் ஏராளமானோர் சாப்பிட்டுக்கொண்டிருந்தனர். அந்த பகுதியில் புளியந்தோப்பு போலீசார் ரோந்துவந்தபோது சந்தேகப்படும்படியாக இரண்டுபேர் நின்றதால் அவர்களை பிடித்து விசாரணை நடத்தினர். அப்போது அவர்கள் பதற்றத்துடன் பேசினர். இதையடுத்து அவர்கள் வந்திருந்த பைக்கில் சோதனை செய்தபோது 2 கத்திகள் இருப்பது தெரியவந்தது.
விசாரணை செய்ததில், சென்னை கொருக்குப்பேட்டை கண்ணகி நகர் 5வது தெருவை சேர்ந்த வினோத்குமார் (31), வியாசர்பாடி பி.பி ரோடு பகுதியை சேர்ந்த அன்பு (29) என்பது தெரியவந்தது. இருவர் மீதும் ஏற்கனவே பல குற்ற வழக்குகள் இருப்பதும் தெரியவந்துள்ளது. அவர்களிடம் இருந்து இரண்டு பைக் மற்றும் 2 கத்திகள், 2 செல்போன்கள் உள்ளிட்டவற்றை பறிமுதல் செய்தனர். ‘‘கொருக்குப்பேட்டையை சேர்ந்த ரவுடிகள் சிலருடன் முன்விரோதம் இருப்பதால் பாதுகாப்புக்காக கத்திகள் வைத்திருந்தோம்’’ என்று 2 பேரும் தெரிவித்தனர். அவர்கள் மீது வழக்குபதிவு செய்து இருவரையும் நீதிமன்றத்தில் ஆஜர் படுத்தி சிறையில் அடைத்தனர்.
