சூதாட்டத்தில் ரூ.20 ஆயிரம் இழப்பு; மது வாங்கி தரும்படி கேட்ட தொழிலாளி வெட்டிக்கொலை: 2 பேர் கைது
3/23/2023 5:31:41 PM
ஓசூர்: சூதாட்டத்தில் ரூ.20 ஆயிரத்தை இழந்த தொழிலாளி, மது வாங்கித்தரும்படி கேட்டபோது வாலிபர்கள் அவரை அரிவாளால் வெட்டிக்கொலை செய்த சம்பவம் பரபரப்பை ஏற்படுத்தியுள்ளது. இதுதொடர்பாக 2பேரை போலீசார் கைது செய்து விசாரணை நடத்தி வருகின்றனர். கிருஷ்ணகிரி மாவட்டம் ஓசூர் அருகே உள்ள காரபள்ளியை சேர்ந்தவர் கூலித்தொழிலாளி மோகன் (27). சோமநாதபுரம் பகுதியைச் சேர்ந்தவர்கள் உமேஷ்(24), மூர்த்தி(20). நண்பர்களான இவர்கள் 3பேரும் நேற்று யுகாதி பண்டிகை விடுமுறை என்பதால் வீட்டில் இருந்தனர். பின்னர் 3பேரும் சேர்ந்து ஏரிக்கரையில் பணம் வைத்து சூதாடினர்.
அப்போது உமேஷ், மூர்த்தி ஆகிய இருவரும் சேர்ந்து மோகனிடம் இருந்த ரூ.20 ஆயிரத்தை ஜெயித்து விட்டனர். இதனால் மனமுடைந்த நிலையில் இருந்த மோகன், மது குடிப்பதற்காக டாஸ்மாக் கடைக்கு சென்றுள்ளார். அப்ேபாது உமேசும், மூர்த்தியும் மதுபான கடைக்கு டூவீலரில் வந்துள்ளனர். உடனே மோகன், உமேஷ், மூர்த்தி ஆகியோரிடம் ஜெயித்த பணத்தில் மது குடிக்க பணம் தரும்படி கேட்டுள்ளார்.
இதனால் மூன்று பேருக்கும் வாக்குவாதம் ஏற்பட்டுள்ளது. ஒருகட்டத்தில் வாக்குவாதம் முற்றிய நிலையில் டூவீலரில் வைத்திருந்த அரிவாளால் உமேஷ், மூர்த்தி ஆகியோர் மோகனை சரமாரியாக வெட்டியுள்ளனர். இதில் பலத்த காயமடைந்த மோகனை அங்கிருந்தவர்கள் மீட்டு, ஓசூர் அரசு மருத்துவமனையில் சேர்த்தனர். பின்னர், மேல் சிகிச்சைக்காக தனியார் மருத்துவமனையில் சேர்த்தனர். இதுகுறித்து டவுன் போலீசார் வழக்குபதிவு செய்தனர்.
இதனிடையே மோகனை அரிவாளால் வெட்டிய உமேஷ், மூர்த்தி ஆகியோர் டவுன் போலீஸ் ஸ்டேஷனில் சரணடைந்தனர். இந்த நிலையில் மருத்துவமனையில் சிகிச்சை பெற்று வந்த மோகன் இன்று காலை சிகிச்சை பலனின்றி உயிரிழந்தார். இதனைதொடர்ந்து கொலை வழக்கு பதிவு செய்த போலீசார் உமேஷ், மூர்த்தி ஆகியோரை கைது செய்தனர். தொடர்ந்து அவர்களிடம் தீவிர விசாரணை நடத்தப்பட்டு வருகிறது.
