.புதுகை அருகே கார்கள் மோதல் சிறுமி உள்பட 3 பேர் பலி: 9 பேர் படுகாயம்
3/22/2023 5:42:08 PM
புதுக்கோட்டை: புதுக்கோட்டை அருகே கோயிலுக்கு சென்று விட்டு திரும்பிய போது நேற்று இரவு கார்கள் மோதிக்கொண்ட விபத்தில் சிறுமி உட்பட 3 பேர் உயிரிழந்தனர். 9 பேர் காயமடைந்தனர்.புதுக்கோட்டை மாவட்டம் அறந்தாங்கி எம்.ஜி.ஆர். நகரை சேர்ந்தவர் மணிகண்டன்(28). இவர் தனது தாய் வெள்ளையம்மாள் (48), மனைவி நீலவேணி(25), அக்கா மகள் மகிஷா (12), மாமியார் சுமதி(45) ஆகியோருடன் சேலத்தில் உள்ள மாரியம்மன் கோயிலுக்கு சாமி தரிசனம் செய்வதற்காக நேற்று காலை காரில் புறப்பட்டு சென்றார். காரை அறந்தாங்கியை சேர்ந்த கதிர் (28) ஓட்டினார். பின்னர் அவர்கள் கோயிலில் சாமி தரிசனம் முடித்துவிட்டு ஊருக்கு காரில் திரும்பிக் கொண்டிருந்தனர்.
இதேபோல் ராமேஸ்வரத்தில் இருந்து சேலம் நோக்கி 6 பேர் காரில் சென்று கொண்டு இருந்தனர். திருச்சி பாரதிதாசன் கலைக்கல்லூரி பிரிவு அருகே திருச்சி-புதுக்கோட்டை சாலையில் நேற்றிரவு 10.15 மணியளவில் 2 கார்களும் நேருக்கு நேர் மோதிக்கொண்டன. இந்த விபத்தில் கார்களில் சென்ற 12 பேரும் படுகாயம் அடைந்தனர். மாத்தூர் போலீசார் சம்பவ இடத்திற்கு விரைந்து சென்று விபத்தில் காயம் அடைந்த அனைவரையும் திருச்சி அரசு மருத்துவமனைக்கு கொண்டு சென்றனர். ஆனால் அங்கு சிகிச்சை பலனின்றி டிரைவர் கதிர், சுமதி, மகிஷாஆகியோர் பரிதாபமாக இறந்தனர். மற்ற 9 பேருக்கு தீவிர சிகிச்சை அளித்து வருகிறார்கள். இந்த விபத்து குறித்து மாத்தூர் போலீசார் வழக்குப்பதிவு செய்து விசாரணை நடத்தி வருகின்றனர்.
